ახალ ხიბულას - მამაჩემის სოფელს

 ახალ ხიბულას

მამაჩემის სოფელს

 

მამის სიყმაწვილის გზათა ნაკვალევზე,

წვიმამ დააწვიმა ნატვრის ყვავილებით,

ღობე-ყორეს მისდევს ტკბილი მოგონება,

ფიქრთან ხეტიალში ერთად დავიღლებით.

დროსთან გაცრეცილა ძველი საუკუნე,

მოჰყავს დადიანი ახიბლს დანატრული,

მოდის სამეგრელოს დიდი სიამაყე,

მოდის მაისივით გრძნობით დახატული.

მიყვარს ჩემი კუთხის ყანის სურნელება,

სოფლის შარა-გზაზე მამის ნაკვალევი,

მიყვარს ხობისწყალი დარდით უძილარი,

მიყვარს უიმედო ღამე ნაწვალევი.

ზოგჯერ დადიანი მარტო ჩაიქროლებს,

მაშინ დუდუნს იწყებს ლექსთა სტრიქონები,

ღობე-ყორეს მისდევს ძველი საუკუნე,

„ახიბლ“ მეძახის და „ახიბლს“-ს ვემონები.

 

ნინო კემულარიას ლექსების კრებული - „დუმილის ხმაური“