1983 წელს შუა ქვალონის საშუალო სკოლის 100 წლის იუბილე აღინიშნა

1983 წელს საზეიმო ღონისძიებით აღინიშნა შუა ქვალონის საშუალო სკოლის 100 წლის იუბილე.

გაზეთ „კომუნიზმის მშენებელში“ გამოქვეყნებული მასალების მიხედვით მომზადდა მასალა შუა ქვალონის სკოლის ისტორიის და იუბილესადმი მიძღვნილი ღონისძიების შესახებ.

... სკოლის დირექტორმა ალექსანდრე ცხადაიამ ვრცლად და სასიამოვნოდ წარმოადგინა სკოლის საუკუნოვანი ისტორია. 1883 წელს სოფელში, სტეფანე ჯღარკავას სახლში გახსნილა სკოლა, სადაც მასწავლებლობდა ცხაკაიას რაიონის სოფელ ხორშიდან ჩამოსული ბესარიონ გვასალია. სწავლის ქირა კი 60 მანეთი ყოფილა. ხალხის თხოვნით 2-კლასიანი სასწავლებელის შენობა აუგიათ ახლანდელ სკოლასთან ახლოს (200 მეტრის დაშორებით). 90 წელს მიღწეული მიხეილ ალანია იგონებს, რომ სკოლაში ქართულად მხოლოდ ბუნების კარი ისწავლებოდა. „სახალხო სკოლას“ ინახავდა სოფლის მოსახლეობა. 1921 წელს სკოლა 7-წლიან, ხოლო 1939 წელს გადასულა საშუალო სწავლებაზე...

  მეორე მსოფლიო ომში გაუწვევიათ სკოლის მოსწავლეები და დირექტორი. შინმოუსვლელთა სტენდიდან შემოგვცქერიან სკოლის მოსწავლეები: ნოე ალანია, ვლადიმერ ლეფსაია, ტრიფონ ალანია, აპალონ გრიგოლავა, ამირან ჩიქოვანი... ომის დროს სკოლის დირექტორმა შალვა ფარცვანიამაც სამუდამოდ დაუკავშირა თავისი სახელი სამამულო ომს.

მომხსენებელმა დიდი პატივისცემით მოიხსენია ისინი ვინც სხვადასხვა დროს ხელმძღვანელობდა სკოლას - ერმინე ცომაია, ივლიანე ჯორჯიკია, ვალერიან გვასალია, სიმონ ფაჩულია, შალვა ფარცვანია, პორფილე ნანეიშვილი, ვალიკო ზარანდია; დიდი ხნის სიცოცხლე და ჯანმრთელობა უსურვა ვასო ბუკიას, ვალერიან იოსავას და დავით ახალაიას.

ზეიმის მონაწილეებმა განსაკუთრებული პატივისცემით და სიყვარულით გაიხსენეს რუსული ენისა და ლიტერატურის მასწავლებელი ალექსანდრე თორდია.

ზეიმზე მონაწილეებს მიესალმნენ და თბილი მოგონებებით გამოვიდნენ იროდ ურუშაძე - სკოლის უხუცესი კურსდამთავრებული, მიხეილ ალანია - ფიზიკა-მათემატიკის მეცნიერებათა დოქტორი, ნოე კაკაშვილი - ყოფილი დირექტორი, იზოლდა გვარგვალია - მასწავლებელი, აბდულ ლუკავა - ხობის N1 საშუალო სკოლის მასწავლებელი...