ალექსი ადამია

 ალექსი ადამია დაიბადა ახალ ხიბულაში (18.. წ.). სწავლობდა სასულიერო სასწავლებელში. მსახურობდა ილორის ეკლესიაში.

ფოტოზე მარცხნიდან პირველი ალექსი ადამია, ჯუგუ ადამია, მინადორა ხულორდავა.

ალექსი ადამია იყო ქართველთა შორის წერა-კითხვის გამავრცელებელი საზოგადოების ნამდვილი წევრი.

ალექსის ჰყავდა მეუღლე - ხულორდავა მინადორა და ხუთი შვილი: დიმიტრი, შალვა, ზინაიდა, თომა და ჯუგუ (ესტატე). 1941-1945 წლებში ომში გაიწვიეს ოთხივე ძმა, აქიდან თომა, რომელიც იყო ძველი ხიბულის სკოლის დირექტორი და მასწავლებელი და ჯუგუ (ესტატე) საჯიჯაოს ჩაის ფაბრიკის ტექნოლოგი უგზოუკვლოდ დაიკარგნენ.

მაია დადიანის პირადი მკერავი - ქრისტინე ბარძემიშვილი

 ქრისტინე კიტია-ბარძემიშვილი (დაიბადა ახალ ხიბულაში 1886 წელს; გარდაიცვალა 1971 წ.)

მაია დადიანის პირადი მკერავი.

პაატა ქურდოვანიძის კომენტარი: "ქალბატონი ქრისტინა კიტია პატარაობიდანვე მაია დადიანის მეთვალყურეობით იზრდებოდა. შემდგომში მაიამ ის, მისსავე ოჯახში, აღზრდილ გიგიშა ბარძემიშვილზე დააქორწინა. თქმა არ უნდა არც მზითევი დაუკლია და ახალგაზრდები სასახლის ახლოსაც დაასახლა. როგორც უფროსი თაობისგან მსმენია გიგიშასა და ქრისტინეს ნებადაურთველათ დადიანების ხიბულის სასახლეში არაფერი გადაწყდებოდა. 1971 წელს მე პირადად მოვინახულე უკვე ასაკში მყოფი ქნი ქრისტინე, ვესაუბრე კიდეც, მაგრამ მას უკვე მახსოვრობის პრობლემები ჰქონდა... ასე რომ ქნი ქრისტინე მაია დადიანს შვილივით ჰყავდა აღზრდილი და მანაც სიცოცხლის ბოლომდე უერთგულა აღმზრდელ ოჯახს. რაც შეეხება ,,მკერავის,, სტატუსს _ ასე მსმენია რომ მაია დადიანი არაფერს გაიკარებდა საკერავი მანქანით შექმნილსო. მხოლოდ ხელით ნაკერს თუ ჩაიცვამდაო. ეტყობა ქრისტინეს მარჯვედ ეხერხებოდა ხელსაქმე და რა გასაკვირია რომ აღმზრდელი ქალბატონისთვის შეეკერა ესა თუ ის ნივთი. იმ წლებში მოსახლეობა ხომ, ძირითადად, ოჯახში შეკერილი ტანსაცმლით იმოსებოდა".

ვალიდა ნანეიშვილი - 50 წელი მკითხველის სამსახურში

 რესპუბლიკის დამსახურებული ბიბლიოთეკარი ვალიდა იონას ასული ნანეიშვილი (1925 წლის 25 ივლისი - 2002 18 ოქტომბერი) დაიბადა 1925 წელს სოფელ საჯიჯაოში. მშობლები ადრე გარდაეცვალა და ზრდიდა ბებია. 1932 წელს  შეიყვანეს საჯიჯაოს რვაწლიანი სკოლაში, რომელიც წარმატებით დაამთავრა 1943 წელს.. სწავლის გაგრძელების მიზნით ბათუმის პედაგოგიურ ინსტიტუტში მისაღები გამოცდები წარმატებით ჩააბარა, მაგრამ ოჯახური პირობების გამო სწავლის გაგრძელება ვერ შეძლო.

1947 წელს მუშაობა დაიწყო სოფელ საჯიჯაოს ბიბლიოთეკაში, სადაც ბიბლიოთეკის გამგედ მუშაობდა 1997 წლამდე. ქალბატონმა ვალიდამ საბიბლიოთეკო სფეროში იმუშავა 50 წელი.

ვალიდა ნანეიშვილი დაჯილდოებული იყო არაერთი ჯილდოთი, მათ შორის: 1989 წელს მიენიჭა რესპუბლიკის დამსახურებული ბიბლიოთეკარის წოდება.

კოლხეთის ათვისების მუზეუმი

ხობის (კოლხიდის) ეთნოგრაფიული მუზეუმი (1971 წელი).

პლაკატი - კოლხეთის მუზეუმი

 პლაკატი სიმბოლურია - კოლხეთის დაბლობის ამოშრობისა და ათვისების ისტორიის მუზეუმი.

1983 წელი.

"ნამარანუ" ხიბულაში

 "ნამარანუ" ხიბულაში

1933 წლის გაზეთ "კომუნისტში" ვკითხულობთ: ხობის რაიონის სოფელ ხიბულის კოლმეურნეობის - "ნამარანუ" თავმჯდომარე აღმოჩნდა ინდივიდუალური მეურნე გლეხი ბასილაია.

პაატა ცხადაიას "სამეგრელოს გეოგრაფიული სახელწოდებანის" მიხედვით სოფელ გაშფერდის ( ხობის რაიონი) საბასილაიოს უბანში მდებარეობდა სახნავი, რომელსაც ერქვა "ნამარანი".

საინტერესოა ამ ადგილს რატომ ეწოდა "ნამარანი"? მარანი ქონდათ თუ ვენახი იყო გაშენებული?!

მარინა გოლავას სტატია - ქორწილი სამეგრელოში

 ზუბის საშუალო სკოლის (ახალი ხიბულის N2 საჯარო სკოლა) ისტორიის მასწავლებლის მარინა გოლავას წერილი მეგრული ქორწილის ტრადიციაზე.

ზუბის საშუალო სკოლის მოსწავლეები ყოველთვის გამოირჩეოდნენ საქართველოს ისტორიის სიყვარულით, რაც სწორედ მარინა მასწავლებლის დიდი დამსახურებაა.

გაზეთი "სამეგრელო", 2001 წელი.

ს. ხიბულაში ხელნაწერთა აღმოჩენის შესახებ

 გაზეთი „ივერია“, 1901 წელი, სოფელი ხიბულა.

ს. ხიბულაში ხელნაწერთა აღმოჩენის შესახებ

როგორც გვატყობინებენ, ს. ხიბულაში თავ. დადიანის ოჯახში აღმოუჩენიათ ერთი შესანიშნავი ხელთ-ნაწერი (კოლოუბანში 1765 წელს გადაწერილი), რომელშიაც საბა-სულხან-ორბელიანის იგავ-არაკები თურმეა მოთავსებული. უმეტესი ნაწილი ხელთ-ნაწერისა შეიცავს აგრეთვე ჯერეთ უცნობს ლექსებს ჩვენის ცნობილის მემატიანის პაპუნა ორბელიანისას. წიგნში მოქცეულია პაპუნასივე ჯერეთ უცნობი პოემა ლექსად, რომელშიაც აღწერილია ვახტანგ მეექვსის თავგადასავალი და ისტორიულნი გარემოებანი 1724-1725 წლებისა.

სოფელ ზუბის სკოლის მშენებლობა

 1979 წელი, სოფელ ზუბის საშუალო სკოლის მშენებლობა.

ახალი სკოლა გაიხსნა 1980 წლის პირველ სექტემბერს.

1924 წლის აჯანყების ერთ-ერთი მეთაური - ახალ ხიბულელი ხარიტონ ლაშხია

 სამეგრელოს 1924 წლის აჯანყების ერთ-ერთი მეთაური - ახალ ხიბულელი ხარიტონ ლაშხია.

ხარიტონ ლაშხია დაიბადა 1893 წელს სოფელ ახალ ხიბულაში. საშუალო განათლებით, პროფესიით აგრონომი. მეფის რუსეთის არმიის ოფიცერი. დაოჯახებული. მენშევიკური პარტიის წევრი 1915 წლიდან. ის იყო ქართველთა შორის წერა-კითხვის გამავრცელებელი საზოგადოების ნამდვილი წევრი.

1919 წელს პარასკევა გეგენავამ, ანტონ ხუბულავამ და ხარიტონ ლაშხიამ ქართველთა შორის წერა-კითხვის გამავრცელებელი საზოგადოების სენაკის განყოფილებას ოც-ოცი მანეთი შესწირეს.

ქვემო სვანეთში მყოფ აჯანყებულებს 1924 წლის 11 სექტემბერს სოფ. ლექსურაში ზემო სვანეთიდან მოსული აჯანყებულები შეუერთდნენ, რომელთა შორის იყო სამეგრელოს აჯანყების მეთაური: ხარიტონ ლაშხია.

ხარიტონ ლაშხიას სასამართლომ დაუმტკიცა წაყენებული ბრალდება გათვალისწინებული საქართველოს სსრ სისხლის სამართლის კოდექსის 61-ე მუხლით და მიუსაჯა თავისუფლების აღკვეთა სამი წლით.

პატარა ქალაქი ახალი ხიბულა -1954 წელი

 პატარა ქალაქი ახალი ხიბულა -1954 წელი.

გაზეთი "კომუნისტი".

ახალი ხიბულა - 1950 წელი

ახალი ხიბულა, მეოცე საუკუნის 50-იანი წლები. გაზეთი "კომუნისტი"

წერილი ფრონტიდან - ვარლამ ბასილაია

 წერილი ფრონტიდან

ვარლამ ბასილაია - მეორე მსოფლიო ომის მონაწილე. დაიბადა 1915 წელს ხობის რაიონის სოფელ ხიბულაში, ომში გაიწვიეს 1941 წელს. უგზო-უკვლოდ დაიკარგა 1942 წელს.

წერილში მოხსენიებული პირები: ზენიდან - შოთა წირღვავა, ხიბულიდან - დორო ჯანჯღავა და ბერაია ხობიდან.

წყარო: ივერიელი

რა გაქრა სოფლის ცხოვრებიდან (ახალი ხიბულა) ბოლო ოცი წლის განმავლობაში.

 რა გაქრა სოფლის ცხოვრებიდან (ახალი ხიბულა) ბოლო ოცი წლის განმავლობაში.

ეს ჩამონათვალი პირობითია და ნებისმიერს შეუძლია დაამატოს საკუთარი მოსაზრება.

1. "ნოდალა" - წლების წინ ოჯახები მოსავალს მეზობლების დახმარებით იღებდნენ და აბინავებდნენ. ეს იყო ურთიერთდახმარების ერთ-ერთი ფორმა. დღეს, ეს ურთიერთობა ჩაანაცვლა მუშების დაქირავებამ.

2. "ინალობა" - ანუ ჭირის სუფრას მეზობლები ემსახურებოდნენ და ოჯახს ფინანსურ ტვირთს უმსუბუქებდნენ.

3. ყოველ ზაფხულს სოფელში ბებია-ბაბუასთან ჩამოდიოდნენ შვილიშვილები და ზაფხულს სოფელში ატარებდნენ.

4. "ოჩერედი" ანუ მორიგეობით პირუტყვის დამწყემსვა გაზაფხულიდან შემოდგომამდე.

5. მდინარე ხობისწყალში ბანაობა. წლების წინ მდინარის ნაპირზე ადგილი არ იყო, ხოლო დღეს სულ რამოდენიმე ახალგაზრდა დადის საცურაოდ.

6. "გარაგადუშა გინულა" ანუ როცა უფროსები ოჯახის საქმეს მოილევდნენ, "გარაგადუშა" მეზობელთან გადადიოდნენ.

7. წლების წინ სოფლის ყველა უბანში სტადიონი იყო და უფროსები და ახალგაზრდები ფეხბურთს თამაშობდნენ. დღეს კი საპირისპირო სიტუაციაა...

 კარლო ვარდია (1920-2002 წ.წ.)

ახალგაზრდა თაობის აღზრდისა და პედაგოგიურ საქმიანობაში გაწეული განსაკუთრებული ღვაწლისათვის, 1997 წელს მიენიჭა ხობის საპატიო მოქალაქის წოდება.

სტატია: გაზეთი "სამეგრელო" 1997 წ.

მოსწავლეები პედაგოგ მარო ფილიავას საფლავთან

 1983 წლის პირველი სექტემბერი.

ზუბის საშუალო სკოლის მასწავლებლები და მოსწავლეები პედაგოგ მარო ფილიავას საფლავთან.

პედაგოგი - მიხეილ ბასილაია

 დამსახურებული პედაგოგი, თაობების აღმზრდელი, მათემატიკის გამორჩეული მასწავლებელი და ხობის საპატიო მოქალაქე, მიხეილ ბასილაია (1929-2020).